كثير من الاشخاص يبحثون عن تطبيقات تحميل الفيديوهات من اليوتيوب بدون جيلبريك او تحميل الفيديوهات من تويتر او حتى تحميل الفيديوهات من الانستقرام او مواقع التواصل الاجتماعي الاخرى وطرحنا في موقعنا عدة تطبيقات تساعدك هالشيء لكن بعضها انحذفت وبعضها مازال موجود ومثل هالتطبيقات دائماً تواجه مصير الحذف بسبب بعض التعقيدات في الحقوق ومن هالاشياء .

• iSound بديل iPlay للتحميل من اليوتيوب و ديليموشن .
• تحميل الفيديوهات من اليوتيوب وتشغيلها بالخلفية بدون جيلبريك .

لكن اليوم جبت لكم تطبيق جداً رائع ميزة هالتطبيق انه سهل الاستخدام جداً ولا ياخذ منك دقايق واللي عجبني ف هالتطبيق البساطه والسهوله يعني لو تجيب انسان جاهل ف التكنولوجيا وهو مايعرف شكل النوكيا وتعطيه ايفون وتقوله شلون يشتغل هالبرنامج بيعوف ويشرحلك طريقته من كثر بساطته .

كل اللي عليك تسويه ضغطة زر وحده ، روح للفيديو اللي تبي تحمله من اي موقع تواصل اجتماعي وعشان اساعدك حطيت لك طريقة نسخ الروابط من اليوتيوب وتويتر وانستقرام .

طريقة نسخ الرابط من اليوتيوب

ف البداية روح للمقطع اللي تبي تنسخ رابطه واضفط على كلمة Share الموجودة بأسفل الفيديو مثل الصورة الموجودة فوق .

بعد كذا اضغط على كلمة Copy link وبكذا انت نسخت رابط الفيديو .

طريقة نسخ الرابط من تويتر

بالنسبة لتويتر نضغط علامة السهم الموجودة اسفل التغريدة مثل الصورة اللي فوق .

بعد كذا نضغط على كلمة Share Tweet via…

الان نضغط على كلمة Copy link وبكذا انت نسخت رابط التغريدة .

طريقة نسخ الرابط من الانستقرام

ف الانستقرام نضغط على الثلاث نقاط ( … ) مثل الصورة اللي فوق .

بعد كذا نضغط على Copy Link .

طريقة تحميل الفيديوهات من اليوتيوب

الان نجي للمليح وطريقة التحميل منه اول شيء لتحميل التطبيق تقدر تبحث عنه في App Store من خانة البحث تكتب اسم التطبيق وهو BlackHole.C .

ماعليكم من الفيس اللي بالصورة اهم شيء ركزو ع التطبيق 🙂 .

او تقدر تحمل التطبيق من هنا مجرد تضغط على Download راح يحولك ع المتجر وتقدر تحمله من هناك .

Download QR-Code

BlackHole Cut

Developer: Saleh Alotaibi

Price: Free

الان بعد ماحملنا التطبيق نروح نشغله وراح يظهر لنا نفس الصورة اللي فوق مافي اي شيء بواجهة التطبيق غير هالدائرة ،الان فعل وضعية المحقق كونان اللي بداخلك وقول شلون تحمل من التطبيق ☻ .

كل اللي عليك بعد مانسخت رابط الفيديو اللي بتحمله تجي هنا بالتطبيق وبس تضغط على الدائرة الموجودة بالتطبيق وانتظر وراح تشوف شريط التحميل ويكتب لك ان التحميل انتهى وراح تحصل الفيديو موجود ف الاستديو .

اذا لسا حاس ان الموضوع صعب تابع معي حطيت انا لك طريقة التحميل من كل برنامج

تحميل الفيديوهات من اليوتيوب

اول خطوة روح لتطبيق اليوتيوب وانسخ رابط المقطع منه .

الان شغل التطبيق واضغط ع الدائرة فقط ضغطه وحده وراح تشوف الشريط الاصفر يتحرك لين يوصل النهاية ويكتبلك ان التحميل انتهى روح للاستديو وراح تحصل الفيديو موجود هناك .

تحميل الفيديوهات من تويتر

اذا تبي تحمل فيديو من تويتر روح للتغريدة اللي فيها الفيديو وانسخ رابط التغريدة بنفس الطريقة الموجودة بالصور .

الان كل اللي عليك تتوجه لتطبيق BlackHole.C وتفتحه وتضغط ع الدائرة الموجودة بنص الشاشة وهو راح يبدأ من نفسه التحميل وراح تلقى الفيديو موجود بالاستديو .

تحميل الفيديوهات من انستقرام

ايضاً نفس الطريقة مع الانستقرام او اي تطبيق نروح للفيديو وننسخ الرابط .

نروح نفتح تطبيقنا المليح ونضغط على الدائرة الموجودة بالنص وننتظر الشريط الاصفر ينتهي ومبروك عليك الفيديو بالاستديو ي وحش .

وبكذا انتهينا من موضوع طريقة تحميل الفيديوهات من اليوتيوب ومواقع التواصل الاجتماعي الثانية وبدون جيلبريك ،اللي ماحمل التطبيق يحمله ويستفيد منه قبل ينحذف من المتجر ☻ .