طريقة إستعادة الاموال من متجر App Store كثير من الاشخاص قد يشتري تطبيق من App Store او يشتري من داخل لعبة او تطبيق إما عن طريق الخطأ كما صار معي او انه اشترى مجوهرات من كلاش اوف كلانس مثلاً وسحبو فلوسه ولا اعطوه شيء بسبب الجيلبريك مثل ماصار معي ايضاً هههههه او عيالك لعبوا في جوالك واشترو المهم اي شيء من هالاشياء مثلاً وسحبوا فلوس من بطاقتك طيب انت تبي ترد فلوسك اللي اخذوها لأنك مو مستفيد من هالتطبيقات او الالعاب لأنك مثل ماقلنا اما ضغط Buy عن طريق الخطأ او احد من اطفالك اشترالك الله يحفظه وش تسوي ، طبعاً ممكن فيه اشخاص مايعرف ان ابل تقدم لك خدمة إستعادة المبالغ اللي دفعتها طبعاً لازم يكون عندك سبب ايضاً ولازم ترفع لهم طلب انك تبي تسترد المبلغ اللي دفعته مع تحديد المشكلة ووصف السبب ولازم تكون خلال فترة هم محددينها وهي تقريباً شهر او 15 يوم والله ما اذكر بالضبط المهم اليوم في هالموضوع راح اشرح لكم الطريقة عشان تستردون المبالغ اللي دفعتوها لأي تطبيق او لعبة او حتى الإضافات من متجر App Store .
طريقة إستعادة الاموال من متجر App Store
عشان تسترد اموالك اللي دفعتها داخل متجر App Store ماتحتاج إلا حساب الـ Apple ID اللي دفعت منه وتابع معي الشرح .
الخطوة الأولى : ندخل للموقع التالي Apple Report a Problem .
الخطوة الثانية : بعد الدخول للموقع راح تظهر لنا صفحة مثل اللي بالصورة التالية طبعاً نكتب فيها حسابنا Apple ID والباسورد ونسجل الدخول ولاتنسى الحساب لازم يكون اللي شريت فيه التطبيق او اللعبة او الإضافة .
الخطوة الثالثة : الان بعد ماسجلنا دخولنا راح تظهر لنا صفحة مثل الصفحة التالية فيها التطبيقات او الالعاب او الإضافات اللي انت شريتها او حملتها وطبعاً امام كل تطبيق او لعبة او إضافة السعر اللي شريته فيه طبعاً اذا كانت اللعبة او الطبيق مجاناً فراح يظهر قدامها Free وايضاً امام كل لعبة او تطبيق او اضافة موجود كلمة Report a Problem وهذي اللي تهمنا .
الخطوة الرابعة : نضغط على كلمة Report a Problem وراح يظهر لنا مثل الصورة اللي تحت خيارات وتحتها مربع طبعاً في خانة Choose Problem اللي راح تظهر عندك تختار عنوان المشكلة .
الخطوة الخامسة : هذي هيخانة Choose Problem من هنا تختار عنوان المشكلة وانا اخترت اني ماقصدت اني اشتري هالطلب .
الخطوة السادسة : بعد اختيار عنوان المشكلة تكتب لهم المشكلة بالتفصيل وتشرح لهم وتوضح لهم في المربع اللي تحت وانا حددت لهم المشكلة وكتبت لهم اني لم اقصد شراء هذا التطبيق طبعاً انا فعلا ماكنت اقصد وهذا كان مجرد شرح وانت عليك انك تشرح لهم بالتفصيل افضل .
الخطوة السابعة : بعد ماتنتهي تضغط على كلمة Submit وراح ينرسل لهم طلبك وخلال يومين تقريباً راح يردون عليك ويمكن مايمر يوم الا ويردون عليك انت وحظك ،طبعاً هذي عملية شراء قمت بشرائها عن طريق الخطأ ولكن لمرور فترة عليها رفضت ابل ترد لي المبلغ ههههههه وظهرت لي الرسالة التالية
This purchase is not eligible for a refund.
طبعاً لازم تكون عملية الشراء مامر عليها تقريباً 30 يوم والله ما اتذكر بالضبط لكن انت اذا اشتريت تطبيق وما عجبك حاول ترده في اقرب وقت وتستعيد اموالك .
وهذي هي طبعاً كانت طريقة إستعادة الاموال من متجر App Store وسهل جداً تطبيقها ولا راح تاخذ منك 5 دقائق .